HAZRAT MAKHDUM ALAUDDEEN ALI AHMAD SABIR QALYARI (R.A)

 HAZRAT MAKHDUM ALAUDDEEN ALI AHMAD SABIR QALYARI (R.A)

Aapki paidaish:-

Hazrat Alauddeen Ali Ahmad Sabir Qalyari Rahmatula ta-ala alaiye 11 rabi-ul-awwal 592 hijri (1196 ishvi)  ko Afghanistan ke shahar Haraat me paida hue.aapki kul umr-mubrak 95 saal hai.Aap ke walid ka naam Hazrat Syed Abdurraheen gilani rahmutalla alaiye  tha jo ek qalandar aur  bade muttaqi,sahib-e-dil aur ba-faiz buzurg the.Aap Hazrat Abdul qadir ginali ki aulad se hue. Aapki walida majida jinka naam hazrat Bibi haajra jo ki farooqi hai aur hazrat umar-farooq ki aulad me se hai , hazrat Baba Fareeduddeen ganj shakr r.a  ki sagi bahan thi.

Aapke Walid ka haraat me aana :-

Hazrat Sabir qalyari ke walid Baghdad se Afghanistan ke shahar Haraat pahuchte hai,aur ek gali se guzarte hai aur dekhte hai ki darwaze ke saamne ek buzurg khade hai aur kahte hai ki syed zaade idhar aayo,aap unke paas jate hai.unka naam Hazrat jamaluddeen hai.Apko hairani hui ke buzurg unka naam kaise jaante hai.wo buzurg aapko apne ghar le gaye aur bithaya aur kaha ki mujhe aapka bade arse se tumhara  intzar tha,aap yaha rukiye.jab hazrat abdurraheen r.a. ne dekha ki wo pahle se hi jaante hai ki main syed zaada hu aur Baghdad se aaya hu to aap waha ruk gaye.uske baad hazrat jamaluddeen ne unki batini aur zahiri tarbiyat dena shuru kar diya, jab aapne dekha ki wo iss makaam tak pahuch chuke hai to aapne apni badi beti se unka nikah kar dete hai.

Aapke 3 bete aur ek beti thi.bade bête Hazrat zafuddeen r.a,unse chhote bête Hazrat Baba fareeduddeen aur sabse chhote bête Hazrat najibuddeen mutawaqqik  aur aapki badi beti ka naam hazrat haajra tha jinse aapne hazrat abdurraheen ka nikah kiya.

Nikah ke baad aap dono haraat me jakar rahne lage aur 1196 ke ander aapko rasool-e-Akram ki zyarat hui aur Hazrat Ali ki bhi zyarat hui to aapne apne bête ka naam Ali Ahmad rakha aur hazrat abdurraheem ne aapka naam Alauddeen rakha .

Pakpatan mein tashreef-avri:-

Hazrat Makhdum alauddeen ali ahmad sabir qalyari ki umar jab 5 saal ki hui to aapke  walid ka intaqaal ho gaya.uske baad jab aapki umar 9 saal hoti hai aapki walida aapko lekar haraat se ajudahan ( paakpatan)  apne bhai baba fareed ke paaas hazir hui aur hazrat sabir ko unke supurd karte hue farmaya ke ab iss bachche ki parwaris aur tarbiyat aap karein.Hazrat baba fareed sabir ki surat dekhte hai aur farmaya ke ye bachcha bada hokar auliya-e-waqt me se hoga aur ek duniya isse faiz yaab hogi.Baba fareed ne khud aapko taleem dena shuru ki.aapki jahanat ka ye alam tha ki aapne 3 saal me hi taamam uloom-e-zahiri hasil kar liye.3 saal baad aapki walida apne bhai baba fareed se ye kahkar haraat wapas chali gai ke ab bhanje ko uloom-e-batini me bhi kaamil kar dijiye aur koi takleef na hone dijiyega.Hazrat Baba fareed mas-ood ganj shakr ko apni bahan se badi mohabbat thi.Hazrat baba fareed ne bahan ke saamne hi bhanje ko mureed karke takseem-e-langar ka kaam hazrat alauddeen ke supurd kar diya.hazrat alauddeen ali ahmad sabir ki umr haala ke kam thi magar  phir bhi  aapne ye aham kaam nihayat khush asloobi ke sath anjam diya.Baba fareed ki khanqaah me do waqt langar takseem hota tha ek ishraatke baad aur dusra abaveen ke baad.hazrat alauddeen ali ahmad sabir qalyari taleem bhi hasil karte aur langar bhi takseem karte.

“Sabir” ka laqab:-

12 saal ke  ke baad jab aapki walida majida ne wapas aakar aapko dekha to tadap gai ,aap such kar kaanta ho gaye the.aapki walida apne bhai baba fareed se jakar khushu kiya to unhone kaha ki tum khud gawah ho ki tumhare saamne hi maine takseem-e-langar ki khidmat unke supurd ki thi.Hazrat alauddeen ali ahmad saabir se pucha gaya to aapne famaya ke aapne mujhse takseem-e-langar ka huqm diya the,ye kab kaha tha usme se kha bhi lena.Baba fareed ne aapse pucha ki bête aap khaate kya the to hazrat sabir ne farmaya ki 4-5 din to bina bhuk ke hi nikal jaate the aur jab bhuk ka ahsas hota main jungal chala jata aur waha ke darakht ke patte kha liya karta tha.ye sun baba fareed par wajd ki kaifiyat taari ho gai,aur aapne shafqat se farmaya “Alauddeen sabir ast”aur usi waqt seene se lagakar khuda jaane kya-kya ataa farma diya.iske alawa bhi aapke mujahida aur karamte iss darja shadeed sabr aazma thi ke unhe sun kar hairat hoti hai.mujahida aur faaqo se aapki tabiyat me bahut hi qahro jalal paida ho gaya tha.

Ek din ali ahmad sabir qalyari  ki walida ne baba fareed ko aapki beti se hazrat alauddeen ali ahmad sabir qalyari ki shadi ki baat ki to baba fareed ne farmaya ke alauddeen ali ahmad sabir ko shadi aur bibi ka koi hosh nahi hai wo fana fillah ke maqam par hai aur uski zindagi istagraq me hi guzregi. lekin bahan nahi maani bhai se shaadi ke liye  israar karte rahi,aakhir kaar baba fareed ne bahan ke jazbaat ka ahtaram karte hue apni beti sharifa  begam ka nikah hazrat alauddeen ali ahmad sabir qalyari ke sath padha diya .Hazrat alauddeen ali ahmad sabir qalyari apne hujre yaani jahan se aap langar takseem karte waha baitha karte the aur wahi aap aitiqaaf me baitha karte the.aap ek din kamre me itna rote hai ki aapki hichki bandh jati hai ,baba fareed aapke kamre ke paas ate hai aur darwaze par hath lagate hai to darwaza khul jata hai ander jakar dekhte hai to sabir qalyari zameen par hai to aap unhe uthate hai aur puchte hai kya hua ,hazrat sabir qalyari farmate hai ki allah ne mujhe duniya se alag kar diya hai ab mujhe auliya allah aur rijal-ul-gaib ke alawa koi nahi mil sakta.ye sunkar aap unki walida se kahte hai ki maine kaha tha ki sabir ki esi halat nahi hai unki shadi ho sake .uske baad hazrat sabir qalyari ki bibi hazrat sharifa bhi istagraq ki halat me rahti aur kuch arse ke baad apka intqal ho jata hai.aur aapki walid ka bhi intqaal ho jata hai.uske baad aap firse langar takseem karte aur istagraq ki halat me rahne lagte.

Ek din hazrat baba fareed ne khwab me dekha ki hazrat khwaja Qutub Bakhtiyar qaki r.a jo aapke peer-o-murshid hai ,baba fareed aur sabir qalyari ko apne sath lete hai aur ek bahut khubsurat mahal me dakhil hote hai  ander jaakar dekhte hai to waha Huzoor-e-Akram sallalalho alaihiwasallam tasreef farma hai .aapne hazrat baba fareed aur hazrat sabir qalyari ko bulaya aur sabir qalyari ki pusht par hath rakhte hue farmaya “Haza waliullah” ye allah ka wali hai.

Ye dekhkar baba fareed subah uthte hai aur hazrat sabir qalyari ke huzre ke paas jaate hai to dekhte hai ki darwaza band hai.fir aap ishraaq ke baad gaye darwaza khula tha.hazrat baba fareed ne aapko bahar lakar bithaya aur ye ailan kiya ke main sabir ko apna khalifa banata hu aur jitney tabarrukaat chishtiya silsile ke the sab unko ataa kar diye.

Qaliyar ki khilafat:-

Hazrat baba fareed ne khilafat nama ataa farmaya aur kaha ke main tumhe qalyar sharif ka ilaka tumhare supurd karta hu. waha taqabbur-o-gurur aur gumrahi ka ek toofan barpa hai.waha pahuch kar khalq-e-khuda ko hidayat do islam ko taqwiyat pahuchao.qalyar mein uss waqt bahut kam abadi chhote chhote teele the.aapke sath baba fareed ne apne mureed hazrat alimulla abdal ko bheja .waha jakar aapne ek budhi aurat ke ghar jiska naam gulzari hai uske ghar me qayam farmaya.unhone sabir qalyari ki khub mahmaan nawazi ki.

,jab aap wo sanad nama qalyar sharif me waha ki jama masjid me pahuche aur ailan kiya ke mere sheikh hazrat baba fareeduddeen ganj shakr ne mujhko yaha ki wilayat di hai ye kahkar aap wapas  aa jaate hai.aapki ye baat dheere dheere qalyar sharif mein phailne lagti hai.kuch log  aapke paas aane lage .aap unhe batate hai ki islam kya hai ,tauheed kya hoti hai ,aur islam me koi ooch nich nahi hoti aur kahte hai ki tum logo ne jo ye jama masjid banai hai jisme ameero ke liye laga safeh lagti hai gareeebo ke liye alag ye galat hai.

Jab waha ke ameer ,qazi aur sahukaaro ne dekha ki sabir qalyari sabko barabari ka sabak de rahe hai to wo ikaththe hue aur logo ko unke khilaf bhadkane lage aur dhamkane lage.dheere dheere aapke paas aane wale kam hote gaye .ye halat dekhkar aapne alimullah abdal ke zariye baba fareed ko khat likha ke yaha ameer aur qazi bahut shararat kar rahe hai.aur hame yaha ka wali tasleem nahi kar rahe..

To baba fareed ne khat me badi narmi se samjhaya aur khat me hadees aur aaytein bhi likhi aur alimullah abdal ke zariye sabir qalyari ke paas bhej diya.hazrat sabir qalyari khat padhte hai aur khat lekar qazi aur ameer ke paas jakar uss khat ko dikhate hai,jab sabir qalyari ne unko khat dikhaya to waha ke qazi ne khat lekar faad diya aur sabir qalyari ko de diya.hazrat sabir qalyari ne wo khat aur uske sath ek aur khat baba fareed ko likha.hazrat baba fareed ne ab dobara ek khat waha ke qazi ke naam likha aur alimullah abdal ke zariye sabir qalyari ke paas bhej diya.jab sabir qalyari ne khat dekha to khat lekar qazi ke paas lekar chale gaye .waha jakar dekha to qazi aur waha ka ameer dono sath baithe hue the ,jaise hi aapne unhe ye khat diya to unn dono ne wo khat bhi faad diya.uske baad unn dono khato ke sath sabir qalayri ne baba fareed ko ek aur khat likha.aur sab kuch bataya.

Qaliyar mein ta-oon:-

Ab hazrat baba fareed ne aapko likha ke shehar qalyar aapki bakri hai ab chahe aap iska doodh piyo ya iska goust khao.ye khat padhkar aapne khat ko choma ur apne paas rakh liya.ye jawab pakar aap ek din juma ke roz jama masjid me aaye aur bilkul aage jakar baith gaye.waha kuch log aaye aur kahne lage ke utho yaha se ye qazi ki jagah hai to aapne kaha ki ham qutub hai aur qutub qazi se afzal hota hai .ye sunkar unn logo ne aapko zabardasti waha se utha diya aur masjid ke bahar le gaye.jab masjid me sab sajde ki halat me the to aapne jalal mein aakar masjid ko mukhatib kiya aur farmaya ke ab tub bhi sajda karle ye farmate hi azimushshan masjid foran hi zameen bos ho gai..ek aurat aapke paas akar kahti hai ki namaz ke liye to mera beta bhi aaya tha to kya wo bhi mar gaya,to aapne farmaya ke nahi wo zinda hai ja jakar nikal le aur use lekar 12 kos door chali ja ,uss waqye ke baad qalyar me ta-oon fail gaya ,sab waha se bhag gaye jungal ko aag lag gai .ab sirf aap waha bache the.

Aap jis taraf nazar uthate to aapke jalal se uss taraf aag lag jati aur 12 kos tak sab kuch jal kar rakh ho jata hai,aap teele ke upper ek darakht ki shaakh pakde khade ho jate hai aur aasman ki taraf nigah uthakar  istagraq ki halat mein chale jate hai aur issi tarah aap 12 saal guzar dete hai.

Hazrat khwaja Shamsuddeen turq qaliyar mein:-

To 12 saal baad aapke peer-o-murshid hazrat baba fareed ne apne murideen se farmaya ki kon hai jo mere sabir ko jakar bithaye wo 12 saal se istagaq ki halat me hai.To ek shaksh jinka naam hazrat khwaja shamsuddeen alvi turq panipati hai aur kahte hai ki main jata hu,to hazrat baba fareed ne apni duao aur faiz ke sath unhe jaane ki izazat di.aapne unhe kuch tel dam karke diya aur kaha ke tum sabir ke saamne mat jana jab tak ke wo baith nahi jaate.

Jab  hazrat shamsudeen turq panipati hazrat sabir qalyari ke paas pahuche to dekhte hai ki aap ek shaakh pakde khade hue hai aur aasmaan ki taraf aapki nazar hai.ye dekh kar piche aakar khade ho gaye.aur sochne lage ki aisa kya kiya jaaye ki hazrat sabir qalyari istagraq ki halat se bahar aa jaye ,to aapne socha ki jis yaar ke jalwo mein aap khoye hue hai usi ke nagme gungunana shuru kar deta  hu to aap quran-e-kareem ki tilawat karne lage,aapki awaz bahut hi khubsurat thi.aapki tilawat ki awaz sunkar hazrat sabir qalyari istagraq ki halat se bahar aaye,unke iss halat se bahar aata dekh kar hazrat shamsuddeen turq panipati ne tilawat band kar di to hazrat sabir qalyari ne farmaya ki aapne tilawat band kyu kardi to hazrat khwaja shamsuddeen turq ne faramaya ke huzoor aap baith jaiye fir tilawat karta hu to ye sunkar hazrat sabir qalyari ne unse kaha ki hame bithaiye.hazrat khwaaja shamsuddeen ne aapki kamar ko piche se pakadkar bithaya aur baba fareed ka dam kiya hua tel unke hatho aur kadmo par lagaya.uske baad aapne kaha huzur mujhe pakpatan wapas jaana hai aur sham hone wali hai,jab sabir qalyari ne pakapatan ka naam suna to aansu aa gaye kahne lage tum mere murshid ke shahar se aaye ho kaha ke haa huzoor mujhe baba fareed ne bhejaa hai .aapne kaha ki agar aap mujhe rokte hai to thik hai warna mujhe jaane dijiye,to ye  sunkar sabir qalyari ne kaha ke tum yahi ruk jaao.uske baad aapne kaha ki huzoor bhuk lagi hai to aapne farmaya ke ped se gulariya todo aur khao,to unhone gulariya todkat ubali aur sabir qaliyari ke saamne lakar rakh di.sabir qalyari ne kaha ki kahte kyu nahi to hazrat shamsuddeen turq farmane lage huzur aap nahi kha rahe to main kaise khao .to aapne kaha ke laao hame bhi khilao.fir aapne kaha ke hame wuzu karao aur fir jitni namaze thi aapn saari padhi.namaz ke baad aapne hazrat shamsuddeen turq panipati se farmaya ke jab isha ki namaz ho jaye to mere saamne na aana mere piche hi raha karna.jab isha ki namaz ho jati to aap aalam-e-istagraq me chale jaate aur jab tahajjud ki namaz ka waqt aata to hazrat shamsuddeen aapke piche aate aur quran ki aaytein aapke kaan me kahte to aap istagraq ke haal se bahar aate aur namaz padhte.

uske baad hazrat shamsuddeen turq aapki khidmat ke liye wahi rahne lage aur jab bhuk lagti to darakht se tod gulhadiya ubalkar kha lete hai.hazrat sabir qalyari ne aapko apna mureed bana liya.aap ne ek hujra tameer kiya apne sheikh ke liye aur fir sabir qalyari aapko zahiri aur batini taleem dene lage aur aap ab istagraq ke haal me sirf isha se subah tak rahne lage.logo ka waha aana jaan shuru ho gaya.

Hazrat Ameer khusro ki aapse mulakat:-

Ek din hazrat nizamuddeen mahbub-e-ilahi ke ek mureed hazrat ameer khusro sabir qalyari ki khidmat me hazir hue .hazrat sabir qalyari ne unki bahut mahmannawazi ki aur apne faiz se unko nawaza.mahfil saji aur kalam padha gaaya ameer-e-khusro ne bhi kalam padha.jab hazrat ameer khusro wapas apne sheikh hazrat nizamuddeen auliya ke paas pahuche to aapne unka istaqbal kiya aur pucha ke kya tumne unhe dekha to kaha ke haa huzoor maine unhe dekha to hazrat nizamuddeen auliya ne unki aankhon ko chuma fir pucha kya tumne unse musafa kiya to kaha ke haa huzoor maine unse musafa bhi kiya to hazrat nizamuddeen ne unke hatho ko chuma.

Ek din hazrat baba fareed ke qawwal qaliyar aate hai aur logo se puchte hai ki yaha sabir qalyari ki khanqaah kaha hai to logo ne unhe bataya ke wo teele par ek jhopdi hai wahi khanqaah hai .to wo qawwal waha jaate hai aur hazrat sabir qalyari ke paas jakar khade ho jaate hai,bahut der khade rahne ke baad sabir qalyari ne aankhein kholi to  pucha ke kon ho to kaha ke main baba fareed ke yaha se aaya hu,pahle to aap kahne lage ke kon fareed ,fir unhone kaha ki fareeduddeen ganj shakr tab aapne kaha ki achcha tum mere sheikh ke paas se aaye ho kaha ke haa.to aapne hazrat shamsuddeen turq se kaha ke ye hamare sheikh ke paas se aye hai inhe kuch khane ke liye do to unhone golariya unhe dedi ,unn qawwal ne wo golariya apni  paas rakhi aur socha ki baba fareed ko dikhaunga ki kya diya hai.sabir qalayari fir aalam-e-istagraq me chale jaate hai.hasan qawwal baba fareed ke paas pahuche to baba fareed ne unse pucha ke kya tum mere  sabir ke paas bhi gaye the,to unhone kaha ke haa huzoor main unke paas gaya aur kaha ke ye golariya di hai mujhe .baba fareed ne unse pucha ke kya kaha mere sabir ne to unhone kaha pahle to maine kaha main baba fareed ka qawwal hu ye sunkar wo bole ke kon fareed fir maine kaha ke baba fareeduddeen ganj shakr to fir unhone kaha ki achcha mere sheikh ke  yaha se aaye ho tum.ye sunkar baba fareed ki aankhon me aansu aa gaye.aap foran uthe aur do nafl adaa ki aur ailan kiya ke aaj se ham sheikh hai to aapke mureedo ne kaha ke huzoor aap to pahle bhi sheikh the, baba fareed bole ke sheikh to tha par mere sabir ne aaj se pahle kabhi nahi kaha wo itne aala mansab par pahuchne ke baad bhi pane sheikh ko nahi bhoola.

Hazrat sabir qalyari bahut bade shayar bhi the aur sama ke shokeen the,wo kabhi-kabhi aalam-e-istafraq ke haal main bhi kalam kahne lagte aur hazrat shamsuddeen unke kalam ko likh lete. Aapke kalam ke kuch ash-aaar iss tarah hai:-   

                             

                        “ Imroz shah-e-shaha mahma shudast mara,

                         Jibreel ba malayak darban sudast mara,

                        Ahmad bahisht-o- dozakh bar ashika haramast

                        Inja raza-e-jana rizwa sudast mara” 

Baba fareed ka wisaal:-

 13 saal ke baad aapko apne sheikh hazrat baba fareeduddeen ganj shakr r.a.ke wisal ki khabar mili to aapko bada dukh hua ke mere peer-o-murshid ka wisaal ho gaya.to aap hazrat shamsuddeen turq se kahne lage ke mere peer ko fana aur baqa dono maqam hasil the.ye sunkar hazrat shamsuddeen farmane lage ki huzoor ye fana aur baqa kiya hota hai.to aap kahne lage ki waqt aayega to ham tumhe dikha denge.jab hazrat shamsuddeen ko 19 saal aapki khidmat mein ho gaye aap kahne lage ki ae shamsh ab tu ja aur rozi roti kama aur jab mera wisaal ho jaaye to tu aa jana ,aur kafan lete aana .to shamsuddeen farmane lage ke huzoor mujhe pata kaise chalega ki aap wisaal farma gaye ,to aap kahne lage ki tum dehli jakar foj me  dakhil ho jana aur jab foz ke tamam diye bujh jaye aur bas ek diya jale to samajh jana ke mera wisaal ho gaya.fir hazrat shamsuddeen turq dehli aakar foz me dakhil ho gaye. 

Fana aur Baqa ka waqya:-

Aap foz me dakhil hokar khema bana kar rahne lage ,sardiyo ka mosam tha aur aapke paas ka khema foz ke genrel ka tha wo apne khadim ko wuzu ke liye pani garam karne Ko aapke paas se aaag lane ko bhejta tha ,ek din aap kheme me na mile to uss khadim ne dekha ki aap paas k eek taalab se wuzu kar rahe hai,uss khadim ne socha ki itni sardi me thande pani se wuzu kyu  kar rahe hai .to wo unke paas chale gaye.jab uss khadim ne usi jagah se  pani liya jahan se hazrat shamsuddeen wuzu kar rahe the to wo pani garam tha aur baki pani thanda tha,ye dekhkar wo khadim ne socha ke shayd ye mera bharam ho,fir jab dusre din bhi waqya hua to genrel ne apne khadim se pucha ke aaj itni jaldi kaise pani le aaye to usne sab kuch bata diya.ek din isha ki namaz ke baad tez aandhi chalne lagi aur tamam foj ke kheme udh gaye magar hazrat shamsuddeen turq panipati ka khema nahi udha aur aap ander diye ki roshni me quran ki tilawat kar rahe hai.ye dekhkar genrel hairan ho gaya aur kahne laga ke huzoor aap allah ke wali hai dua kar dijye ke qila fatah ho jaye ,to aapne farmaya ke pahle mere paise do jitney din maine kaam kiya hai aur mera istifa manzoor karo uss genrel ne waisa hi kiya.ab main yaha kaam nahi karunga aur tum subah ke waqt hamla kar dena allah tumahe fatah dega..ye kahkar aap apne sheikh hazrat alauddeen ali ahmad sabir kalyari se milne ke liye chal pade .aapne socha ke itni jaldi main waha kaise pahuchunga ye sochna tha ki aapko thokar lagi hai aur aap behosh hokar gir gaye aur jab aapki aankh khuli to dekhte hai ki aap qaliyar me hai aur apne peer ki jhopdi ke paas lete hue hai.uth kar dekhte hai ke aapke peer ke paas ek sher hai aur aapko dekhkar wo sher chala jata hai.

Jab sab kafan ka kaam ho gaya to aap sochne lage ke namaz-e-janaza ke liye koi nahi hai to kuch der baad ek naqabposh ghudsawar aaye aur kahne lage ham padhange namaz. Janaze ki namaz shuru hui namaz se pahle jamat me koi nahi tha lekin jab hazrat shamsuddeen turq salam pherte hai to dekhte hai ta-hadde nigah safeh lagi hui hai.jab shamsuddeen ne namaz padhane ke baad jaate dekha to kaha ke ruko jab koi puchega ke mere murshid ka janaza kisne padhaya to kya kahunga ,aap apna naam to bataiye,jab unn naqabposh ne apne rukh se naqab uthaya to kya dekhte hai ki wo khud hazrat alauddeen ali ahmad sabir qalyari hai jo apna janaza padhane aaye.aur kahne lage ke ae shams yaad hai tumne ek din sawal kiya tha ke fana kya hai aur baqa kya hai lo aaj dekhlo ye jo janaza hai ye fana hai aur apni taraf ishara karte hue farmaya ke ye baqa hai,ye kahkar aap chale gaye.Hazrat shamsuddeen turq waha 3 roz tak rukte hai aur waha se panipat chale jaate hai.                                                                                

 Aapke mazar-e-aqdas ki jalalat ki wajah se 200 saal se bhi zyada arse tak zaaireen ki nigaho se poshida raha. Tazkira al-khaleel me hai ke jo koi bhi aapke mazar ki taraf jata usko bijli jala deti ya koi saanp kaat leta.isliye aapke jalal ki wajah se door tak abaadi qayam na ho saki.

Hazrat sheikh abdul quddoos gangohi r.a:-

Hazrat sheikh abdul quddoos gangohi ek din hasb-e-mamool apne dada murshid hazrat sheikh abdul haq ke mazar par jhaadu dene me mashgul the ke awaz aai ke hamare mazar par bhi jhadoo de diya karo.hazrat sheikh abdul quddoos ye na samajh sake ke ye kiski awaz hai .chunanche aapne mazar par baith kar muraqba shuru kiya to pata chala ke awaz hazrat sabir qalyari ki hai.Usss waqye ke baad sheikh abdul quddoos gangohi apne mureedo ke hamrah unke mazar-e-aqdas par pahuche .waha quran khwani wa fatiha karwai aur halwa sharai ke tosha par Huzoor-e-akram ki rooh ko sawab pahucha kar hazireen me taqseem kiya .hazrat sheikh abdul quddoos gangohi ne teen roz waha qayaam kiya aur mazar aqdas par saya kiya .uske baad hazrat sheikh alauddeen ali ahmad sabir qalyari ne unki dua se apni jalalat ko poshida kar diya .aur zaaireen apke mazar ki zyarat ke liye aane lage.

Hazrat sheikh alauddeen ali ahmad sabir qalyari ka salana urs-mubrak 13 rabi-ul-awwal (1291 ishvi)  se qaliyar sherif me shuru ho jata hai mahfil-e-sama me qawwal aarifana kalam pesh karte hai.jisme aqeedat mand gulhaay-e-aqeedat pesh karke roohani kaif-o-suroor ke sath duniya-o-akhirat ki sar bulandi wa sar farazi ki daulat se malamaal hokar wapas jaate hai.ye allah ke janisharo ki tareekhein hai jo insani nazro se rooh-posh hone ke bawajood sadiyo se hazaro anjumano ,lakho majlisho aur karodo dilo mein aaj bhi zinda hai,itna arsha guzarne ke bawajood aapka mazar paak qalyar sharif me aqeedat mando ke liye marj-ul-khalayaq hai.  

                                             
“Innallaha ma-assaabireen”
 “Beshak allah sabr karne walo ke sath hai.”

Please comment mein apna feedback zarur de..