HAZRAT SULTAN SYED MAKHDOOM ASHRAF JAHANGIR SAMNANI R.A.

                                                           

HAZRAT SULTAN SYED MAKHDOOM ASHRAF JAHANGIR SAMNANI R.A.

Mere pyare bhaiyo aur bahno aaj main aapko ek aise allah ke walo ke baare me batane ja raha hu jinhone apne rab ke liye apni poori saltanat ko chhod allah ki raah me chhod diya.

waise to ese bahut se allah ke wali guzre hai jinhone apne rab ki khatir apni huqumat ko chhod diya ,lekin jo mashur hai wo ek Hazrat Ibrahim Bin Adham aur dusre Hazrat Sultan Makhdum Ashraf Jahagir Samnani.

To aaj ham Sultan Syed Makhdum Ashraf Jahangir Samnani ki zindagi ke baare me ilm hasil karenge.mujhe ummeed hai ki iss post se aapke ilm me izafa ho.

Hazrat Sultan Syed Makhdum Ashraf Jahangir Samnani Rahmatulla ta-ala  alaiye  ki tareekh -e-padaish 712 hijri hai or tareekhe wisaal 28 muharram 832 hijri (6 november 1428 ishvi )  hai.Aapki kul umr mubarak 120 hai.hazrat syed gous-e-paak ke 151 saal baad aap paida huye aur aaj aapko duniya se gaye hue 632 saal ho chuke hai.aapka mazar india ke utter pradesh jila faizabad ke  kichhocha sharif me hai.

Naam-e-mubarak par tafsira:-

• Sultan- aapke naam me sultan isliye lagta hai kyunki aap samnan ke sultan the.jise aapne allah ki raah me chhod diya aur fakeeri ko ikhtyar kiya.
• Syed-aapke naam me syed isliye lagta hai kyunki aap aulade rasool hai or aapka silsila-e-nasab hazrat mola-e-qaynat Ali ibne abi talib tak pahuchta hai.
• Jahangir-aapko jahangir isliye kaha jata hai kyunki jahagir ka matlab hota hai jahan ko pakde wala aapne apni poori zindagi me 3 baar poori duniya ka chakkar lagaya isliye aapke peer-o-murshid ne aapko ye laqab ataa farmaya hai.
• Samnani-samnani aapko isliye kaha jata hai kyunki aap mulk-e-samnaan ke sultan the jo ki iran me mojood hai.

Seerat:-

Siraj-ul-aarifeen Gous-ul-alam Hazrat Sultan Syed Makhdum Ashraf Jahangir Samnani aalam-e-tasawwuf ki ek aesi mumtaz aur roohani shakshiyat hai,jinka chamakta hua suraj hai jinhone roohaniyat aur ilm ki duniya ke har kone ko roshan kiya hai.Aaiye ham unki zindagi aur talimat par nazar dale.

Khandan-e-darakht:-

Hazrat Syed Makhdum Ashraf Jahangir Samnani ka silsila-e-nasab kuch is tarah hai:-

 Syed Makhdum Ashraf Jahangir Samnani, Hazrat Syed Ibrahim Noor Bakhshi ki aulad hai aur wo ,Sultan Syed Nizamuddeen Noor Bakhshi ki aulad hai aur wo, Sultan Syed Nizamuddeen  Aleshra ki aulad hai aur wo, Sultan Zahiruddeen Muhammad ki aulad hai,aur wo Sultan Tajuddeen Bahlol ki aulad hai,aur wo Syed Muhammad Noor Bakshi ki aulad hai,aur woSyed mahdi ki aulad hai ,aur wo Syed Kanaludden ki aulad hai.aur woSyed jamaludden ki aulad hai,aur wo Syed Hassan Sharif ki aulad hai ,aur wo Syed Abu Muhammad ki aulad ahi,aur wo Syed abul Musa Ali ki aulad hai,aur wo Syed Ismail Saani ki aulad hai,aur wo Syed Abul Hassan Muhammad ki aulad hai,aur wo Syed Ismail Areez ki aulad hai,aur wo Hazrat Syed Zafar Sadiq R.A. ki aulad ahi,aur wo Hazrat Syed Imam Muhammad Bakar R.A. ki aulad ahi,aur wo Hazrat Syed Imam Zainul Abideen R.A. ki aulad hai,aur wo Hazrat Syed Imam Hussain R.A. ki aulad hai,aur wo Hazrat Mola-e-Qayenaat Ali Ibne Abi Taalib ki aulad hai.

Aapke walid ka naam Hazrat Ibrahim Noor Bakhshi rahmahulla hai.Aap Samnan ke sultan the.Jahan unhone 20 saal tak nihayat hi insaaf aur khuloos ke sath hukmrani ki.Wo na sirf ek Badshah the balki ek aalim bhi the aur batini tor par tasawwuf ki taraf mail the.Wo islami bachcho ka ahtaram karte the aur islami huqumat ki sar parasti karte  the.Yahi wajah hai ki unke dor-e-huqumat me 12 hazar talba mukhtalif idaro me taleem hasil karte rahte the aur wo apne dor ke sufi darwesho se milte rahte the aur unse sufiyana ilm hasil karte the.Unhone sheikh Hazrat Hassan shaq ki khankaah ki tameer karwai aur Hazrat Imam-e-Azam ki mazar par bhi tameeri kaam karwaye.Unhe baqaida mutaala karne me tareekhi tabri ki kitabo ka shok tha.Hazrat Lateef Ashrafi me Hazrat Najim yamani ne zikr kiya hai ki Hazrat Makhdum Ashraf kaha karte the ki unke walid ke dor-e-huqumat me 12 hazar islami idare kaam kiya karte the.

Hazrat Bibi Khatija Begham Syed Makhdum Ashraf ki walida thi.unka taaluk Hazrat Ahmad yasvi ki nasl se tha jo apne waqt ke ek mashhur sufi the aur owaisiya huqm ke bani the.Unki walida ne ek saaf suthri aur pakiza mazhabi mahol me parwarish paayee jiske natije me wo gahri mazhabi ,zahan,muttaqi aur parhezgaar thi.wo  apna zyadatar waqt quran paak ki tilawat me guzarti thi.wo aksar din me roze rakhti thi raat me jaagti thi taki namaz me guzar sake. Wo tahajjud  ki bahut paband thi aur mukhtasar ye hai  ki wo apne aba-o-ajdad ki amanat ki amanat thi.

Jab Hazrat Ibrahim Noor Bakshi ki umr mubarak 25 saal hui to aapne allah ke rassol ki sunnat pat amal karte hue nikaah farmaya.aapka nikah ek sufi gharane me hua or aapki bibi ka naam Hazrat Khatija Rahmahulla se hua or inka shajra alvi hai jo mola-e-qaynat se jakar milta hai Hazrat Ibrahim saltanat ke sultan the. Allah ne aapko betiyo se nawaza par aap apne janasheen hone ke liye 8 saal tak bete ki dua karte rahe.ek din aapke darwaze par ek majzoob Ibrahim aaye to  apne darwaza khola to unhone kaha ki beta chahiye to soda karo1000 ashrafi do or ashraf lelo to aapne turant 1000 ashrafi dedi uske baad un majzub ne farmaaya ki jao allah ne tumhe ashraf de diya or fir wo chal diye kuch dur chalne ke baad  wo majzub gayab ho gaye.Un fakeer ki dua se allah ne aapko ek beta diya jinka naam Syed Makhdum Ashraf Jahangir samnani r.a hai.

 708  hijrii me samnan (iran) me aapki paidaish hui.Aapne 7 saal ki umr me hi quran-e-kareem hifz kar liya uske baad aapne hadees-e-rassol aur mukhtalif shakho jaise tafseer,hadees ,fiqh, aur deegar musameen ki taleem me mashgool ho gaye. Aur faqat 14 saal ki umr me aapne saare uloom me maharat hasil karli thi.aapke ilm ka charcha poori dunya me hone laga.

Tarq-e-Saltanat:-

Allah ki mazi ne unke sar par badshahat ka taaj rakha.Ye ek tarikhi haqeekat hai ki unhone poori zimmedari ke sath riyasat ke umoor jaari rakhe,lekin wo fitri tor par tasawwuf aur sulook ki aur maail the.Wo aksar apna waqt roohaniyat ke mutabarraq sufi darvesho ki sohbat me bitaya karte the.wo riyasat ke umoor se nagavaar mahsus karte the aur sulook aur marfat ke bare me ilm hasil karte the.Allah ki had se zyada muhabbat ke aage jo unke dil me jal rahi thi uske natije me had se zyada duniya se nafrat aur bezaari badhane lagi.Umoor mumalik ke sath jab wo 23 saal ke hue to unhone Hazrat Owais Qarni R.A. ko khwab me dekha jinhone zubaan istemaal kiye bagair azqaare owaisiya(owaisiyo ki yaad aavri) ki taleem di.Wo 3 saal tak azqaare owaisiya me lamha ba lamha mashgul rahe jiske natije me Allah se muhabbat ki chhupi hui aag aur zyada bhadak uthi aur unhone apne aapko uss aag me khud jala diya.Ek din Hazrat Khizr Alaihissalam unke samne aaye aur farmaya ke ae Ashraf wo din aa gaya hai jis maqsad ke liye aapko duniya me bheja gaya hai.Duniyavi takht tarq karein aur Hindustan ki taraf ravan ho jaye jahan sheikh Alaulhaq  ganj nibat bechain hokar bangal ke pandwa me aapke muntazir hai..

Jab aapke walid hazrat ibrahim ka wisaal ho gaya to unke wisaal ke baad aapne Hazrate Khidra Alaihissalam ke mashvare ke mutallik aapne takhte samnan ko chhod diya aur apne chhote bhai Hazrat sultan Muhammad Arif aur apni walida Hazrat Khatija ko Hazrat Khidra Alaihissalam ke mashware ke bare me bataya aur unse izazat talab ki ke wo apne maqsood muqaddas pandwa sharif ki taraf safar kare.To aapki walida ne khushi-khushi aapko izazat dedi kynki unhe pata tha ki Ashraf ki manjil samnan nahi balki Hindustan main hai jahan wo apni roohaniyat aur ilmi tarbiyat ke zariye islam ke gulshan ko abaad karenge.

Aap 1000 sainiko ke sath Hindustan ke liye ravana ho gaye.Hazrat Syed Makhdum Ashraf un sainiko ke sath teen marahil tak gaye fir aapne un sainiko ko wapas bhej diya aur apne sath sirf ek ghoda aur ek nokar ko rakha .10 din ke baad aapne uss nokar ko bhi samnan wapas jane ko kaha aur khud akele aage safar karne lage.

“Tarq-e-duniya gar sultan shaavi,Mahar me asrar ba jaan sha”

“Ae Asgraf  iss duniyavi takht ko chhodo , taki aap badshah aur Allah ke faqeer dost ban jaaye.”

Aap 6 mahine ka safar karke Bukhara se hote hue wo ooch sharif,multan pahuche jahan unhone Hazrat Makhdum Jalaluddeen R.A se mulakat ki jahan unhone aapka istaqbal kiya aur aapko roohani fazlo karam se nawaza.Fir aapne Makhdum Jalaluddeen se izazat mangi aur apni manzil ki taraf ravana ho gaye

“Azmat daar raah maqsood har giz, Nabyaad karad baarsi badargaah”

“kisi ko raaste me nahi rahna chaiye, Taki koi jald hi manzil tak pahuch sake.”

Kuch din aur raat qayam karke aap pandwa ke liye ravana ho gaye aur Lahore pahuch kar Hazrat Data Ganj Baksh ke mazar par Hazir hue aur roohani rahnumai bhi hasil ki.Waha se aap delhi aaye aur waha aap Hazrat Qutubuddeen Bakhtiyar Kaki R.A. ki mazar par aur Hazrat Nizamuddeen Auliya ki mazar par haziri di aur roohani faiz hasil kiya.

Paandwa sharif me istaqbal:-

Hazrat Shaikh Alauddin wal haq paandwi ki rohani kashish esi thi ke wo zyada der tak kisi jagah thaharne ki bajaye apne maqsood muqaddas tak pahuchne ke liye apna safar jaari rakhe.Bade daryaao aur pahado aur sahraao se guzarte hue  aur raaste me har mushkil ka saamna karte hue wo bihar pahuche.wo tezi se bihar se guzarte hue  bangal ki taraf ravana  ho gaye kynki peero murshid ki tawajjo ki wajah se wo bechain the.Jab aap paandwa sharif ke kareeb pahuche to Hazrat Alaulhaq uth kar khade ho gaye aur dodh kar bahar aakar khade ho gaye aur ek doli lekar apne khadimo ke sath unke istaqbal ke liye chal diye.Sheikh Alaulhaq ki itni bechani dekhkar aapke khadimo ko Hazrat Makhdum Ashraf ki gair mamuli hasiyat ka pata chala.Hazrat Makhdum Ashraf ne jis maqsad ke liye takhte samnan ko chhoda ab wo poora hone wala tha.Jab Hazrat sheikh Alaulhaq R.A. ne unhe aate hue dekha to aankhon me aansu aa gaye aur jab kareeb pahuch gaye to dono aapas me gale mile .

“Chi kashi bashaad bad ki eez indarazi, Ba auhayad  raasad aumeed weyad.”

“kitna achcha hai ke taveel intezaar ke baad,Ummeed mando ko apni manzil tak pahucha deta hai”

Pandwa ke uss ilake se Hazrat Makhdum Samnani doli me baithe hue apne sheikh ki khanqaah ke liye ravana hue.Hazrat Makhdum samnani doli ke niche rakhne se pahle hi kud kar apne sheikh ki tazeem ke liye darwaze par jakar khade ho gaye.Fir ander pahuch kar dastarkhan bichhaya gaya aur khana tanavul farmaya.Un tamam rasumat ke baad Sheikh alaulhaq pandwi ne unhe chishtiya aur nizamiya ke silsile me apna shagird bana liya unhe khilafat bhi dedi.Hazrat Makhdum Ashraf shagird banne ke baad bade khush the kyunki unhe wo chiz mil gai thi jiske liye unhe itna taweel intezaar karna pada tha.

Paandwa sharif se ravangi:-

Ek din jab hazrat makhdum ashraf ki umr mubarak 31 saal hui to aapke murshid ne socha ki syed makhdum ko koi laqab diya jaaye to isha ki namaz ke baad jahangeer ki awaaze aane lagi usi din se aapko ye laqab diya gaya. Jab Sheikh ki sohbat me 6 saal guzre to uss arse ke doran unhe irfaan aur roohaniyat ke tamam raazo ke ezaz se mansub kiya gaya.ek din hazrat alaulhaq paandwi ne unse kaha ki ae ashraf maine aap par tamam haqaiq aur ilm ko mukammal kiya hai main aapke liye ek jagah pasand karta hu jahan aapko aqliyat aur islah ke chirag ko roshan karna hoga.ye sun kar aapki aankhein bhar aaye kyunki  wo apne sheikh se judai pasand nahi karte the.lihaza sirf judai ki baat hi unke liye nakabile bardasht thi.unke sheikh ne unke liye kichhocha sharif ko pasand kiya.Wo sheikh se izazat lene ke baad kichhocha ke liye ravana ho gaye.Wo kuch din ke liye jonpur me rahe jaha sultan Ibrahim shah sharqi aur qazi shahabuddeen daulatunki azmat aur roohani aur kirdaar ki paakizgi ko dekhne ke liye unse bahut mutasir hue.waha se wo safar karte hue kichhocha sharif me pahuche.

Mazhabi aur deeni khidmat:-

Ye ek kubool shuda haqiqat hai ke irfan islam ne har dor me islam ke maqsad ke liye giran kadr khidmaat anjaam di hai.mazhabi aur adbi khidmaat jo Hazrat Makhdum Samnani ne anjam di hai.aam tor par tasawwuf ki tareekh ka sunahra baab hai.unhne kichhocha sharif me kufr ke andhere me islah aur roohaniyat ki shama roshan ki aur gumrah logo ko raah e raast par lagaya.rivayat hai ke 12 hazar gair muslimo ne islam ko unke kirdar ki paakeezgi aur roohaniyat se mutasir hokar qabool kiya.Hazrat nizami yamani ne apni kitab “lateef-e-ashrafi”me likha hai ki wo jaha bhi jaate uss ilake ki boli me roohani takreer farmate aur uss boli me 4 kitabe likhte aur unn kitabo ko unke fayde ke liye wahi chhod dete.

Syed Makhdum Ashraf ki likhi hui kitabe :-

·        Kanzul asrar

·        lateefe ashrafi

·        Maqtubaate ashrafi

·        Shiri sikandar nama

·        Sherul asrar

·        Deewane ashraf

·        Basharat-ul-murideen

·        Naaahvi ashrafiya

·        Risala vahdul wajud

·        Irshad-ul-akhwaan

·        Tafseer nor bakhya

·        Fatawa ashrafiya

·        Bashrat-ul-akhwan

·        Fawayade islam

·        Bahrul zikr

·        Ashrafi insaf

 inke alawa bhi bahut si kutub likhi hai.

Mahbub-e-yazdani:-

Hazrat sultan syed makhdum ashraf Jahangir samnani ne mahbubiyat ka darja paya.ye mahbube yazdani 27 ramzan 782 hijri ko roohe aabad me apne shagirdo ke sath shamil the,achanak har goshe se ek awaz aani shuru ho gai”Ashraf Mera Mahbub”.ye asmani awaz thi,mahbibuyat ke darje ki khushkhabri thi.tab se unhe mahbube yazdani kaha jane laga.ye sultan syed makhdum ashraf ki roohaniyat thi.jahangir samnani har fajr ji namaz masjide haram me padha karte the.jis din aapko ye roohani ezaz ata kiya gaya Hazat Nizamuddeen asfahani haram me me mojud the,kabe me subah ki namaz padhne aaye sultan samnani ko dekh kar unse kaha ki aao mahbube yazdani,allah ka diya hua ye laqab aapko naseeb ho.

Gous-ul-alam aur Jahangir:-

Ye ek tareekhi haqiqat hai ki Hazrat sultan syed makhdum ashraf ko pahli rajab 770 ko hazrat banda nawaz gesu daraj ki khanqaah se gous ke waqar se nawaza gaya tha.lihaza aapko jab se gous-ul alam kaha jata hai.unke naam ke sath Jahangir ka laqab bhi bahut mashur hai.ek din wo shagirdo me apne sheikh ke sath khanqaah me baithe hue the.achanak khanqaah ke darwazo aur deewaro se jahagir ki awaaze aane lagi.ye sun hazrat sheikh alaulhaq muraqba me magn ho gaye aur thodi der baad sar uthaya aur unhe Jahangir ke laqab se nawaza kynuki ye ek asmani laqab tha jiski tasdeek unke sheikh ne ki.

Hazrat Makhdum Ashraf Jahangir R.A ke kuch irshadaat:-

·        Ilm chamakta hua suraj hai aur maharat uski kirne hai.Iman aur tauheed ke baad insan par shariyat aur aqwaale haqayaq jaanna wajib hai.

·        Hairat zada aadmi dubti kashti ki tarah hai jo khud dub jata hai aur dusro ko bhi garq kar deta hai.

·        Najayaz aqidatmand shaitan ka pairokar hone ki hasiyat se ilm hasil karta hai.

·        Iss baat ko yakeen banao ki khalis ilm hi aapki madad nahi kar sakta.

·        Kisi bhi muqaddas insane ki kisi bhi lafz ko yaad kare agar esa mumkin na ho to uske naam ko yaad kare aapko faayeda hoga.

·        Janna shariyat hai aur ilm ke mutalliq amal karna tariqat  hai aur dono ke maqasid ko hasil karna hi haqiqat hai,wo jo tarikat me shariyat ki pairvi nhi karta tariqat ke faayde se mahrum hai.

·        Wo shaksh jo shariyat ka sakht pairokaar hoga ,tariqat ka raasta khud ba khud uske liye khul jayega aur jab wo shariyat ke sath tariqat hasil kar leta hai to haq ki ronak roshan ho jati hai.

·        Sulook mein agar koi Huzoor Akram ki ita-at ke raaste zara bhi inharaf karta hai to matluba manzil tak pahuchna na-mumkin ho jata hai.

·        Ghulam ke dilo me allah ki muhabbat aur pyar paida karna aur unke dilo ko allah ki qurbat me mail karna,mashaikhe tariqat ka kaam hai.

·        Sheikh bilkul ek kabil aur tajurbe kaar mualij ki tarah hai jo mareej ki bimari aur mizaz ke liye mojuz dawa ki takhsis karta hai.

·        Khana uss beej ki tarah hai jo salik ke pait ki zami me apni jadein daalta hai,aur amal ka darakht ugata hai,agar khana halal hai to achche amal ka darakht ugta hai aur agar ye haram hai to nafarmani aur gunah ka darakht ugta hai.

·        Faraizo wajibat adaa karne ke baad roohaniyat aur matlashi afrad ke liye zaruri hai ke wo apne keemti zindagi ko muqaddas afrad ki sohbat me guzaare kyunki ese afrad se sirf ek mulakat itna mufeed hai jo bahut saare jahilo se hasil nahi ho sakta.

·        Ek banda dua kare aur raham kare to ye kabil raham hai,kisi ko apni dua me itna mashgool hona chaiye ki wo apne wajood ko bhul jaaye.

·        Wali ki ek shart hai ke wo apne kalam,amal aur aqeeda me Nabi-e-akram ki sunnat ka pairo kaar hona chaiye.

·        Wali ki shart ye hai wo jahil nhi hona chahiye,auliya allah ki bargaah ke wajeer hai aur allah ki khwahishat ke mutaliq kaam karte hai.

Khulafa-e-Makhdum Ashraf Samnani:-

·        Hazrat syed abdur razzaq noorul aein r.a

·        Sheikh kabeer ul abshi r.a.

·        Sheikh daruyatam sarurpuri r.a.

·        Sheikh shamsuddeen faryad raas audahdi r.a,

·        Sheikh usman r.a.

·        Sheikh suleman muhaddis r.a.

·        Sheikh maroof r.a.

·        Sheikh ahmad qatal r.a.

·        Sheikh ruqnuddeen shahbaaz r.a.

·        Sheikh qayamuddeen r.a.

·        Sheikh asiluddeen r.a.

·        Sheikh jamiluddeen r.a.

·        Molana qazazi hazaal r.a.

·        Sheikh arif makrani r.a

·        Sheikh abul karam khujandi r.a

·        Sheikh abul karam haarvi r.a.

·        Sheikh safiuddeen rodulvi r.a.

·        Sheikh samiyeen rodulvi r.a

·        Mola kareem r.a.

·        Sheikh kheruddeen sadhhuri r.a.

·        Qazi Muhammad sadhhuri r.a.

·        Qazi abu Muhammad r.a

·        Molana abul mujaffar lakhnavi r.a.

·        Alimuddeen jeisi r.a.

·        Shekh kamal jeisi r.a.

·        Syed abdul wahhab r.a.

·        Syed raza r.a.

·        Jamshed baig kalander turq r.a

·        Qazi shahabuddeen daulat abadi r.a.

·        Molana haji fakhruddeen jonpuri r.a.

·        Molana sheikh dawud r.a.

·        Molana ruqnuddeen r.a.

·        Sheikh adam usman r.a.

·        Sheikh tajuddeen r.a.

·        Sheikh nurudddeen r.a.

·        Sheikh ul islam abad gujar r.a.

·        Sheikh Mubarak gujar r.a

·        Sheikh haseen dausvi r.a

·        Sheikh safiuddeen r.a

·        Masnad ali saif khan r.a

·        Sheikh ahmad kanulori r.a

·        Molana Abdullah diyar banarasi r.a

·        Molana nuruddeen zafrabadi r.a

·        Mulk Mahmud baba hussain qutubdar r.a

·        Syed hasan alam baradah r.a

·        Sheikh jamaluddeen rawat r.a

·        Hassam uddeen zanjani panvi r.a

·        Molana khagi Muhammad r.a

·        Sheikh abu bakr r.a

·        Sheikh safiuddeen alveoli r.a.

·        Syed ali lahori r.a

·        Sheikh lodhan r.a

·        Shekh nizamuddeen barelvi r.a

·        Sheikh ali dosti samnani r.a

·        Sheikh amnar r.a

·        Sheikh abu saeed khagri r.a

·        Khwaja abdul rahman r.a

·        Khwaja saduddeen Khalid r.a

·        Qazi sodha audhi r.a

·        Sheikh zahid nor r.a

·        Sheikh  peer ali arlat turqi r.a

·        Sheikh nizamuddeen labar r.a

·        Sheikh ali samnani r.a

·        Sheikh gaus ali r.a

·        Sheikh taqiuddeen r.a

·        Molana sharifullah r.a

·        Sheikh nizamuddeen r.a

·        Sheikh yahya kaldar r.a

·        Sheikh meer mola r.a

·        Qazi baig r.a

·        Sheikh qutubuddeen yahya r.a

·        Khwaja nizamuddeen  aol r,a

·        Sheikh muhiuddeen r.a

·        Amir nangar qali r.a

Hindustan me unka mission:-

Ye ek tarikhi haqiqat hai ki hazrat syed sultan makhdum ashraf Jahangir samnani r.a ne apne sheikh ke marqaz kichhocha sharif aur apne sheikh hazrat alaulhaq paandwi ki ittala par rahnumai ki,wo yaha aaaye aur khanqaahe ashrafiya ko tameer kiya .unhone do masjido ki tameer bhi ki ,ek masjid khawateen ke liye aur dusri masjid mardo ke liye.aur apne niji kamre me ek maqbara banwaya.uss waqt kichhocha sharif me sadhu aur jogi aabad the.chunache kufr ke andhere ne uss ilake ko apne lapet me le liya tha ,isliye aapko waha par islam ki shama roshan karne me bahut si mushkilat ka saamna karna pada.lekin apke kirdar aur roohaniyat ki pakeezgi jo ek sufi ki khususiyaat hoti hai ,usne gair muslimo ko magloob kar diya .aur mukhtasar arse me lakho kafiro ne islam kabool kar liya aur silsilaye ashrafiya me aa gaye.mukhtasar ye hai ki islam aur tasawwuf ke liye unki khidmaat bila shuba islam ki tareekh me bahut ehmiyat aur ek aham mukaam ki hamil hai.

Aap har saal haj farmate or madina munawwara me hazir hote aur tab tak tak nhi jaate jab tak allah ke rasool se izazat nhi le lete.uske baad aap yemen aur kai or mumalik me bahut se allah ke waliyo ke sath saalo guzare.Fir waha se aap dobara apne murshid ke paas aa gaye.Aap apne bhanje Hazrat Abdur Razzaq Noorul ain ko quran ki tarbiyat dene lage.Hazrat syed makhdum ashraf ko apne bhanje abdur razzaq se badi muhabbat thi or aap hi ne unhe noorul ain ka laqab ataa farmaya.Hazrat Syed Makhdum Ashraf apne bahnje ki tarbiyat ke baad unki shadi ki fiqr hone lagi to aapne unka nikah ek syed gharane me kar diya.Aapki hi ki nasl se silsilye ashrafi jaari hua jo aaj poori duniya me phaila hua hai.

Karamate:-

Hazrat sultan syed makhdum ashraf Jahangir samnani tasawwuf aur roohaniyat ki ek esi aala hasiyat par the ke mukhtalif aukat par mukhtalif makaamat par be-hisab karamate tareekh ke saf-aat par bikhri hui hai.ye ek nakabil tardeed haqeeqat hai ke unki zindagi ka har lamha karamat par mabni ,mutasir kun aur asar angez tha .

Ek baar jab wo ameer tameer ke ilake me safar kar rahe the to unko dekhne ke liye ek aadmi behad mohaq ho gaya aur unke baar me intahai ehtaram ka izhar kiya.Hazrat makhdum samnani ke sath wo pahad par chadh gaya .to uss aadmi ne hazrat se kaha ke jaha tak aapki nazar jaati hai ,main aapke nazdeek aane wale tamam ilako ko aapko tohfe me de dunga,hazrat ne kaha ki aap meri nazar me aane waale ilako ke malik nahi hai,fir hazrat ne uske sar par apna hath rakha aur pucha ki wo kya dekh raha hai ,to uss aadmi ne afsos aur nadamat ke sath jawab diya ke main makka mukarrama aur madina munawwar ko dekh raha hu .

Ek din aap damishq ki masjid me baithe hue ibadat kar rahe the ki achanak ek aurat apne mare hue bete ko lakar masjid ke darwaze par lakar rakh deti hai or zor zor se rone lagti hai to aap bahar tashreef lakar uss bachche se kahte hai ki uth ja teri maa tere liye mari ja rahi hai to wo bachcha uth kar khada ho jata hai.aapki iss karamat se waha bahut charcha ho gaya or fir aap waha se chal diye.aap ek jagah zyada waqt tak nahi rukte the.

Ek din aap apne peero murshid ki bargah se aa rahe hai raaste me ek maqam padta hai zafraabad aur aapke sath aapke ek mureed hazrat gulkhani hai. unhe raaste me ek khubsurat murti nazar aa jati hai or wo wahi ruk kar uss murti ko dekhne lag jaate hai.kuch dur chal kar Hazrat Syed Makhdum Ashraf rukte hai aur puchte hai ki gulkhani nazar nahi aa rahe to unke mureed unhe batate hai wo ek murti ko dekhne lage the ,to apne farmaya ki mujhe bataya kyu nahi chalo wapas unke paas chalte hai.

 Waha jakar dekha to Hazrat Gulkhani uss murti ko badi gor se dekh rahe hai ki unhe Syed Makhdum ke paas aane tak ki khabar na hui..

Hazrat ne apna  hath unke kandho par rakha jisse wo hosh me aaye or apne murshid ko dekh kar ahsas-e-beadbi hua or rone lage fir maafi mangi to Hazrat ne kaha chalo .Kuch door chal kar Mkhdum paak ne hazrat gulkhani se farmaya ki ye gulkhani tumhe wo murti bahut pasand hai na to usse jakar kaho ki Makhdum Ashraf ne bulaya hai ,Hazart gulkhani waha jate hai aur uss murti se kahte hai chal tujhe mere murshid ne bulaya hai..itna sunna tha ki wo patthar ki murti ek khubsurat ladki ban jati hai.jisse makhdum paak ne hazrat gulkhani ka nikah karwate hai aur unse ek nasl chali jo aaj madras me  mojud hai.aur uss nasl ki ye ek nishani hai ki unke hath ki chhoti ungli patthar ki hai.Hazrat Syed Makhdum paak ki bahut si karamat kitabo me milti hai.

Talimaat:-

Aapki zindagi sufiyana thi aap apni kitab me khud farmate hai ki main sufiya ka mashrab rakhta hu.aapne farmaya ke mere naam jinno or buri ruho ko dur rakhne ke liye bada asar rakhta hai isliye aapke mazar par hamesha ese marizo ki bheed lagi rahti hai jo jinno aur bad ruho se pareshan hai.Aapke zariye silsil-e-ashrafi jari hua jo aaj bhi poori duniya me phaila hua hai aur aapko  urdu zabaan ke baani bani bhi kaha jata hai..

Aap hamesha ibadat me mashruf rahte aur zyadatar waqt masjid me guzarte.Raato ko jaagkar ibadat karte aur din me deen ki tablig karteAap sunnat par pabandi se amal karte aur dusro ko taleem dete ki pahle ilm-e-deen hasil karo fir ibadat karo.Aapka faiz aaj bhi poori duniya me faila hua.

Aapne apni qabr mubarak khud banwai aur do din aphle uss qabr me baith kar aapne apne mureedo ki tarbiyat farmai aur apne mureedo ke piche namaz adaa ki or kalma-e-tauheed padhte hue apne rab se ja mile.Aapne 808 hijri me kichhocha sharif me wisal farmaya.har saal 26-29 muharram  tak aapka urs-e-mubarak manaya jata hai.

               Hazrat Muhaddis-e-azam aapki shaan me irshad farmate hai :-

“Samnan ka takht chhodkar gaus-ul-wara hue,Yu saltanat ke tarq ne sultan bana diya”

Please comment mein apna feedback zarur de....